Lögreglan á höfuðborgarsvæðinu fékk til sín óvenjulegan gest á dögunum, en talið væri að hann væri slasaður. Var hann geymdur í klefa á Hverfisgötu, „eins og sumir aðrir“ segir á Facebooksíðu lögreglunnar.

Í tilkynningu lögreglunnar kemur eftirfarandi fram:

Því miður kemur fyrir að næturgestir hjá lögreglunni eru ósáttir við dvölina og hefðu frekar viljað vera heima hjá sér.
Þannig var einnig með hrafn sem rataði til okkar en í fyrstu var talið að hann væri slasaður. Eftir skamma skoðun var ljóst að krummi væri heill á líkama, en hefði bara ekki enn lært að fljúga sökum ungs aldurs. Þá fóru að berast tilkynningar um hrafnspar í miðborginni, sem gargaði óvenjulega mikið og þótti þá ljóst að einn ungann vantaði í hreiðrið.

Hafði parið haldið vöku fyrir íbúum með háværu krunki sínu. 

Okkar fólk brást fljótt við og skipulagði björgunaraðgerð, ásamt Slökkviliði höfuðborgarsvæðisins, þar sem hrafnsunganum var komið til síns heima, í laup foreldra sinna. Þess ber að geta að á meðan björgunaraðgerðum stóð, stóð hinum öldnu foreldrum ekki á sama, flugu yfir og görguðu á björgunarmenn. 

Enginn hrafn slasaðist við aðgerðina og íbúar reyndust sérstaklega þakklátir fyrir að geta nú sofið án hávaða frá áhyggjufullum „foreldrum“ sem hafa víst krunkað mikið síðustu daga.