Söngvarinn George Michael er látinn, 53 ára að aldri. Stjarnan sem hóf feril sinn með hljómsveitinni Wham lést á heimili sínu í Bretlandi í dag um klukkan 14 að íslenskum tíma. Lögreglan segir að enginn grunur sé á voveiflegum aðstæðum hvað andlát hans varðar.
George fæddist Georgios Kyriacos Panayiotou í London og seldi meira en 100 milljón plötur í gegnum tíðina. Var söngvarinn að vinna að nýrri plötu með framleiðandanum Naughty Boy, samkvæmt frétt frá BBC.
Talsmaður Michaels segir: „Með mikilli sorg í hjarta staðfestum við að ástkær sonur, bróðir og vinur okkar Michael lést nú um jólahátíðina.“
Biður fjölskyldan um frið til að syrgja á erfiðum tíma. Árið 2011 frestaði Michael mörgum tónleikum vegna lungnabólgu og var hann milli heims og helju. Hvíli þessi frábæri söngvari í friði.
