Fyrrum besta vinkona söngkonunnar Selenu Gomez, Francia Raisa, gaf Selenu nýra árið 2017. Þær eru ekki lengur vinkonur og hafa ekki talast við í marga mánuði.

„Þær hafa ekki talað saman síðan í október,” segir vinur beggja kvennanna í viðtali við Radar.

Eins og slúðuraðdáendur vita brotnaði Selena niður í október 2018 og lagðist inn á geðsjúkrahús. Drykkja og neyslu var um að kenna, en hennar fyrrverandi, Justin Bieber gifti sig í september.

Francia (31) gaf Selenu nýrað sumarið 2017, en Selena er haldin lupus, sjúkdómi í stoðvef, og nýru hennar voru farin að gefa sig. Sagði Selena af því tilefni að án Franciu hefði hún látist: „Hún gaf mér raunverulega gjöf og fórnaði öðru nýra sínu fyrir mig. Ég er mjög blessuð.”

Aðeins nokkrum mánuðum eftir nýrnagjöfina sást Selena full á Four Seasons hótelinu í New York. Nýrnalæknirinn Dr. Robert Fafalak – sem hefur ekki umsjón með veikindum Selenu – sagði í viðtali að ef þeir sem haldnir eru sama kvilla og Selena héldu áfram að drekka gætu þeir dáið.

Selena neitaði að tjá sig um áfengisneyslu sína þegar hún var spurð: „Einkalíf mitt, einhver sér mig fá mér vínglas? Mér er drullusama. Ég er ekki að reyna að fela mig, svona er líf mitt,” sagði hún í viðtali við Elle.

Francia var mjög veikburða eftir nýrnagjöfina: „Ég gat ekki haldið á hundinum mínum, hann er sjö kíló. Það var erfitt. Ég gat ekki farið með hann út að labba.”

Francia hefur ekki sést í meira en ár með Selenu og óskaði henni ekki til hamingju með daginn 22 júlí.

Hvorug hefur tjáð sig um vinslitin eða hver staðan er á vinskapnum.