Fyrir allflesta nýbakaða foreldra eru svefnlausar nætur daglegt brauð. Foreldrar reyna með öllum ráðum að ná að minnsta kosti átta tíma samfelldum svefni, en það er ekkert gefið í þeim efnum! Ein sniðug móðir fann upp ráð sem hefur verið deilt ótal sinnum á samfélagsmiðlum…hún fær nefnilega frí frá dóttur sinni í 12 tíma á nóttu.

Laura Gerson frá Essex í Bretlandi hefur notað þetta snilldarráð í níu mánuði og dóttir hennar Amelia sefur í 12 tíma samfleytt. Hún sagði í viðtali við Mirror: „Við erum með myndbandsvaktara og ég var að horfa á hana eitt kvöldið þar sem hún var að leita að snuðinu sínu og fann það ekki. Þá vaknaði hún og grét þangað til við komum að rétta henni það. Ég lét tvö snuð í rúmið næstu nótt, en það datt á gólfið, þannig næstu nætur bætti ég alltaf við fleiri snuddum! Í 99% tilfella vildi hún bara snuðið sitt og gat þannig sofnað sjálf.“

Nú sefur Amelia með 10 snuddur í rúminu!

„Hún er ekki svo hrifin af snuðinu á daginn en á nóttunni er það henni mikilvægt. Að hafa svona mörg snuð í rúminu auðveldar henni að finna þau og hún heldur stundum á tveimur og er með eitt uppí sér,“ segir Laura.

Foreldrarnir hafa ekki þurft að fara inn til hennar í um átta mánuði en hún er að verða eins árs. Þau hafa að sjálfsögðu enn myndbandsvaktarann og athuga ef stúlkan er að gráta af annari ástæðu: „Svefninn er líka friðsælli þar sem við þurfum ekki alltaf að vera að fara inn í herbergið hennar.“