Hér er kominn hinn fullkomni haustbúðingur í ofni, guðdómleg samsetning af ferskum ferskjum, smjörlegnu hunangi með sífþeyttum Mascarpone kremrjóma og ristuðum möndlum.
Þessa uppskrift bar fyrir augu okkar gegnum matreiðslublogg The Londoner sem við fundum á Pinterest og við stóðumst ekki þá freistingu að snara uppskriftinni yfir á íslensku og birta hér, enda algjör dásemd!
Uppskriftin nægir fyrir fjóra:
4 vel þroskaðar og fallegar ferskjur
Fljótandi hunang
250 grömm Marscapone ostur
150 grömm matreiðslurjómi
1 tsk vanilluþykkni
Möndluflögur
Forhitaðu ofninn í 180 gráður; skerðu og steinhreinsaðu ferskjurnar niður í tvo helminga.
Leggðu því næst niðurskornar ferskjurnar á bökunarform, snúðu aldinkjötinu upp og settu örlitla smjörklípu í sárið þar sem aldinsteinninn var áður.
Láttu því næst fljótandi hunang drjúpa ofan á ferskjurnar. Hafðu hugfast að ferskjurnar eru mjög sætar, því þarftu ekki ofgnægt af hunangi.
Láttu ferskjurnar bakast í ofni í u.þ.b. 20 mínútur. Haltu auga á þeim í ofninum til að tryggja að þær brenni ekki. Á meðan ferskjurnar eru að bakast í ofninum, skaltu útbúa kremþeytinginn og rista möndluflögurnar.
Settu nú Marscaponeostinn, rjómann og vanilluþykknið saman í skál. Þú getur líka tekið hráefnin til í skál og látið bíða í ísskáp ef ert í tímaþröng og þarft að hafa hráefnin tilbúin með stuttum fyrirvara.
Settu litla steikarpönnu á hellu og þegar pannan er orðin hæfilega heit, skaltu rista möndlurnar á pönnunni. Gættu þess að velta möndlunum vel á pönnunni svo þær brenni ekki, slökktu svo á pönnunni og leyfðu ristuðum möndluflögunum að kólna. Þegar 20 mínútur eru liðnar, ættu ferskjurnar að vera orðnar vel brúnaðar og mjúkar. Taktu ferskjurnar út úr ofninum og berðu fram heitt fyrir gestina.
Ef ætlunin er að bera fram eftirréttinn einan og sér fyrir vini og fjölskyldu er hæfilegt að bera fram tvo ferskjuhelminga fyrir hvern og einn, en ef ferskjubúðingurinn er borinn fram sem eftirréttur eftir kvöldverð er ein sneið sennilega meira en nóg fyrir hvern gest!
