Grandalaus húsmóðir nokkur í Bandaríkjunum, sem glaðbeitt festi kaup á sumarkjól nú fyrir fáeinum dögum, fékk aldeilis óvæntan glaðning í kaupbæti. Ekki fyrr var frúin nefnilega komin heim og klæddi sig í kjólinn fyrir eiginmanninn en stund sannleikans rann upp: Kjóllinn var þakinn flennistórum …. PÍKUM. Í orðsins fyllstu merkingu og það án þess að dónalegur ásetningur hafi legið að baki.

Konan, sem heitir Sam, deildi ljósmynd af kjólnum á Facebook og greindi frá því að hún hefði hreinlega ekki komið auga á mynstrið fyrr en heim var komið. Þá var hún steinhissa á viðbrögðum eiginmannsins sem sagði henni í fullri hreinskilni að hún hefði í orðins fyllstu merkingu keypt …. píkukjól:

„Nei, ég bara sá þetta ekki, mér fannst mynstrið bara flott! Ég keypti bara kjólinn því mér fannst hann flottur … svo kem ég heim og fer í kjólinn fyrir eiginmanninn og hvað haldið þið að hann hafi sagt?“

Kjóllinn, sem kostar heila 219 dollara og er seldur HÉR er dásamlegur á að líta og segir meðal annars á vefsíðunni sjálfri að kjólnum sé ætlað að kynda undir sjálfstraust kvenna. Hvort þar er verið að vísa í mynstrið sjálft sem einmitt, óneitanlega minnir hreint út sagt á píku, er hins vegar á huldu.

Hér má hins vegar sjá stöðuuppfærslu hinnar lánsömu húsmóður sem deildi dýrðinni á Facebook og uppskar viðbrögð tæplega 9000 notenda á samskiptamiðlinum og eru þá þær lánsömu kynsystur konunnar, sem sjálfar deildu ljósmyndum af þeirra eintaki í athugasemdum. 

Dásamlegar athugasemdir og lífleg stöðuuppfærsla!