Viltu láta klósettið skína? Þetta er ekkert grín…WeAreFeel fæðubótaefnakeðja frá Bretlandi, markaðssetur nú vítamín í takmörkuðu magni sem inniheldur glimmer. Hefur uppátækið vakið töluverða athygli fyrir óvenjulega auglýsingaherferð, en er talið að þetta sé í fyrsta sinn sem einhver reynir slíkt.

Hægt er að fá 30 töflur á um 15 dali og inniheldur hver tafla vítamín og steinefni, s.s. A vítamín, D3, fólínsýru, zink og járn ásamt fullt af glimmeri. Glimmerið meltist ekki og þar af leiðandi mun klósettskálin glansa.

„Gum arabica er efni sem unnið er úr acaciatrénu og er oft notað í matvæli. Samt sem áður meltir líkaminn það ekki að fullu þannig neytandinn fær tilætluð áhrif,“ stendur m.a. á vefsíðu WeAreFeel.

Vill fyrirtækið með þessu vekja athygli á hversu „skemmtilegt “ það er og blandar saman gamani og heilsu: „Við uppgötuðum ætilegt glimmer og við getum ekki beðið eftir að setja það í allar vörurnar okkar!“ segir Boris Hodakel, stofnandi WeAreFeel. „Það á ekki að vera leiðinlegt að lifa heilsusamlegu lífi, það á ekki að vera litlaust og glatað. Vonandi gerir glimmerklósett eitthvað fyrir fólk og ýtir á það að taka sinn daglega skammt af vítamínum.“

Vítamínin fóru í sölu í síðustu viku og eru einungis 50 box í boði. Auðvitað seldust þau upp eins og skot og ekki er vitað hvort hægt sé að fá þau á næstunni. Fólk sem keypti getur þó allavega sett myndir af glimmerkúk á samfélagsmiðla…