Söngkonan Christina Aguilera hefur talað mjög illa um söngþáttinn The Voice að undanförnu og er talið að hún hafi alls ekki sætt sig við að Miley hafi komið í hennar stað: „Christina er að reyna að selja tónlistina sína og allt í lagi með það. Hún ætti samt að passa sig að slúðra ekki svona mikið í þeim tilgangi. Það er eins og hún hafi aldrei jafnað sig á því að Miley fékk vinnuna hennar,“ segir innanbúðarmaður í viðtali við Radar.

Eftir að Miley hafði komið fram einu sinni var Christina ekki beðin um að koma aftur: „Christina var erfið, bæði við þátttakendur og í samstarfi. Hún gerði þetta alveg sjálf. Framkoma hennar var þannig að enginn vildi vinna með henni lengur.“

Christina sagði í viðtali í tilefni nýrrar plötu við Billboard Magazine að hún „myndi aldrei koma fram í þættinum aftur.“ Sagðist hún ekki vera í þessum bransa til að koma fram sem þáttastjórnandi í sjónvarpi: „Það var ekki fyrir mig að fylgja öllum þessum reglum. Sérstaklega sem kona: Þú getur ekki verið í þessu, þú mátt ekki segja þetta. Ég reyndi mitt besta að tjá mig í gegnum klæðnað, farða eða hár. Það var þannig sem ég reyndi að miðla mínum skoðunum.“